В.М.Регеж-Горохов

Кугу тӱняште
Шуко эл коклаште
Лач тый гына
Улат, мотор, чечен
Да волгыдо кечан илем.
Чодрат лоҥгаште
Ме порын илена,
Ваш-ваш келшен.

О шочмо-кушмо
Да кечын ужмо
Марий Элна –
Пӱрымашна,
Тыланетше
Чон гыч лекше
Пӧлекна лийже мурына.

Пелед тый манын,
Ме она чамане
Вийнам, ушнам
Да кӱчык ӱмырнам,
Да, куткыла ыштен пашам,
Тыштак илалын,
Эрласе кечынам
Ме таптена.

Улат тый поро,
Тый нигӧм от орло,
Чылам вӱчкет,
Шунен-шунен ончет.
Эре тыгаяк кумылан,
Яндак чонанак
Илен тый код эрлат,
Марий Элна.