Мутшо Юрий Рязанцевын
Семже Иван Егоровын

Ала шошым, ала сылне шыжым,
Ой, огеш лий тидым умылаш.
Самырык, ораде чоныш пиже
Йӧратымаш, йӧратымаш.
Кайык муро дене темше чодыраште,
Кече дене модшо куэрлаште
Мыйын ныжыл муремже йоҥгалтше,
Мурыштемже - чон шонымем.

Ошкылам кумда лупсан нур дене,
Чинче семын тудо йылгыжеш.
Муро ден ӱжам мый - толжо манын
Йӧратымаш, йӧратымаш.
Ах, муремже, чоҥеште торашке,
Изи шӱдыр чеченем коклашке.
Ну, а шке моткоч лӱдам мый,
Ах, лӱдам, лӱдам толмыж деч.

Но арам, векат, мурем йоҥгалте,
Колын огыл тудым шӱмбелем,
Но ты шӱдыр гай эре волгалтын
Йӧратымаш, йӧратымаш.
Кайык муро дене темше чодыраште,
Кече дене модшо куэрлаште
Чеверласышым мый пӱрымаш ден,
Чеверласышым йӧратен.