Шкетан лӱмеш марий кугыжаныш театр 17 апрельыште эрдене эрак 8-ше марий погынлан омсажым почын. 8 шагат эрдене Погынын икымше кечыже регистраций дене тӱҥалын.

10 шагатлан Александр Таныгин, Вячеслав Мамаев, Шамрат Шамыкаев Юмылан пелештеныт. Россий да Марий Эл гимным колыштмек, Погыным Оньыжа, Владимр Козлов почын. Пашаче президиумым пеҥгыдемденыт. Вара Марий калык Марий Эл Республик президентым Леонид Маркеловым вашлие. Леонид Маркелов «Поро кече, пагалыме делегат-влак» марла саламлалтме мут дене тӱҥалын. Да марий калыкын тачысе илышыж нерген иктешлен ойлен. Кундемыштына экономик вияҥме дене марий калыкын тӱвыра илыш проблемыжлан да илыш-кыл йодышлан тӱткытым ойыраш лийме нерен палемден. А экономик вияҥме шотышто Марий Эл Республик Юл кундем федерал округышто ик виян пашам ыштыше регионлан шотлалтеш.

Марий калыкын йылмыжым, йўлажым арален кодаш манын пашам ыштыме нерген докладым ыштен. Пытартыш 7 ий жапыште Марий Элыште марий йылме дене 170 тӱжем книгам лукмо. Тыгак печать паша вияҥын шога. Кундемна мучко 4 республикысе газет, 5 журнал лектеш да тыгак районышто 5 газет лекме нерген палемден. Марий тӱвыра вияҥмаште тыгак театр-влакын пашашт нерген мутым луктын. 2 театр идалык мучкылан 4 премьере дене калык ончыко лектеш. Тидланже 1 миллион теҥгем ойырымо. Тыгак марий калыкын тӱвыражым вияҥдымаште телевиденийын да радион пашажымат ӧрдыжеш коден огыл. Радион идалык мучко пашам ыштыме жапше 3 тӱжем шагатыш шуымым палемден. Тидыже марий калыкын историйыште – эн кугу показательым ончыкта. Интернет дене пайдаланен, кундемысе увер-влакым торасе кундемыште илыше марий-влак эскерен шогат. Тыгак Леонид Маркелов тӱшкан илыме верыште марий калык-влаклан чырык еда газетым лукмо нерген мутым луктын. Да лишыл жапыште кӱштымашым ямдылаш да пеҥгыдемдаш сӧрыш.

Леонид Маркелов Марий кундемнам вияҥшым да тӱзланышым ужаш шонымыжым каласен кодыш. Тидланже ваш келшен, умылен илыман. «Марий калык - ӧрыктарыше калык. Тӱжем дене ий эртыме семын, шке йӱлажым, йылмыжым, тӱвыражым арален кодаш вийым муын» – тыге палемден шке докладыштыже Марий Эл Республик президент.

Марий калыкын тӱшкан илыме вер гыч колтымо саламлыме мут-влак йоҥгеныт. Мандат комиссийын палемдымыж почеш 8-ше марий погыныш 318 делегат сайлалтыныт да тышечын 294 делегатше регистрацийым кечывал жап марте эртен.

8-ше марий погынын паша радамжым пеҥгыдемдыме годым делегат-влак кокла гыч ешартышым пуртымо нерген темлымаш пурен. Тиде Юрий Русанов Уставыш вашталтышым пурташ темлен.

А паша радам почеш Оньыжа отчётым ыштен, ревизий комиссий 2004 ий 24 март гыч тӱҥалын тенийсе 14 апрель марте отчётым лудын. Да тыгак Михаил Васютин икешлыме докладым ыштен.

А кечывал деч вара докладым ыштыше-влакын пашаштым акленыт, иктешленыт, тыгак темлымашым ойленыт.

Аня Левагина

Увер йогын (mp3)