Бизнес-тӱшкер (бизнес-сообщество) 5 ияш пашам иктшлен да Марий Эл Республикын торгайыме да йӧнозанлык палатын тӱҥлӧ директоржым (генральный директоржым) сайленыт. Тиде погынымашыш Виктер вуйлатышын алмаштышыже Ильяс Якупов да Палатын членже-влак, йӧнозанлык гыч 70 пашаеҥ толыныт. Торгайыме да йӧнозанлык палатын тӱҥлӧ директоржым 5 ий жаплан сайлат. Палатын шушаш 5 ий паша жапшылан ончычсо тӱҥлӧ директоржым, Герман Деменьевым сайленыт. Экономикыште сай лектышыш, у кӱкшытыш шуашлан – ыштен лукмо продукцийын ончержым моштен эртарыман. Тидланже пошкудо кундемлашке семинар дене лекман. Тиде да моло палемдыме пашам шукташлан Палатылан верым кугемдыме да ачалыме пашам ышташлан полшаш палемдыме. Тыге ачалыме пашалан республик бюджет гыч 9 пеле миллион теҥгем ойырат. 1 ноябрьлан ончер пӧлемым 800 квадрат метрлан кугемдаш улыт. Вес тӱҥ паша – тиде Палатыште пашаеҥ-влакын чотыштым кок пачаш шукемдаш. Тидын нерген мари медиа сайт увертарен. Кундемышытна вӱдшор тылзыште моткоч шуко вере тул азап лиймым палемдыме. Пытартыш 3 арня жапыште 10 тул азап лиймым палемдыме. Пакчаште шӱкым эрыктыме дене мутлан, Волжск олаште «Пеньково» сад-пакчаште иканаште 18 пӧрт йӱлен. Пожар лӱдыкшӧ дене кылдалтын, Николай Куклинын кӱштымыж почеш, арня мучко яллаште тул азап лиймым эскерыше службо калык дене вашлиймашым эртара. Да пожар лийме деч аралалтме нерген мутланыме пашам эртараш тӱҥалыт. Тидын нерген пожар лиймым шекланыше Виктемын пресс-службыжо увертарен.
Тӱҥалтыш да кокла профессионал шинчымашым пуышо тӧнеж-влак коклаште конкурсым иктешленыт. Тушто 71 тунемме тӧнеж сеҥышыш лектын. «Туныктыш» кугыжаныш проект кышкарыште эртаралтше таҥасымашке 59 регион гыч чылаже 221 йодмаш пурен. Нунын коклаште Марий Элат лийын. 20 миллион теҥгеаш грантым Йошкар-Оласе медколледж да чоҥышо (строительный) техникум налыныт. Тиде шийвундым тунеммаште у технологийым пуртымо пашалан кучылташ тӱҥалыт.
22 апрельыште «Идалыкын туныктышыжо» конкурсын республик кӱкшытысӧ ужашыже тӱҥалын. Таче Йошкар-Олан 11 № школышто 38 туныктышо да воспитатель-влак шкешотан таҥасымашым эрташ тӱҥалыт. Конкурс 22 апрельыште тӱҥалеш да 25 апрель марте шуйна. 22 апрель гыч тӱҥалын туныктышо да воспитатель-влак шке паша опытышт дене палдарат, а арня мучко мастер-классым, урок эртымым ончыктат. Тыгак жюрилан конкурсант-влак «Паша кӱкшытын формулжо» нерген палдарат. Ты марте тыгай конкурс ола кӱкшытыштӧ эртен. Тыге иктешлымек, «2008 ийын туныктышыжо» лӱмым 15 № кыдалаш школын химий туныктышыжо Наталья Малькова налын. А «Идалыкын воспитательже» лӱм дене 1 № йоча садын воспитательже Марина Добрынина палемдалтын. 25 апрельыште сеҥышыш лекше-влак кундемнан чапшым Россий кӱкшытыштӧ аралаш тӱҥалыт.
Кундемыштына поро паша озалана. «Единая Россия» партий «Поро корно» акцийым увертарен. Акций дене келшен кундемна мучко поро пашам ышташ тӱҥалыт. Тыге Марий Турек, Юрино районысо шоҥго пӧртлаште илыше-влаклан пайрем концертым эртараш, Волжск, Горномарий районышто сарыште вуйым пыштыше-влакым шарныме лӱмеш ойырымо верыште эрыктыме, тӱзатыме пашам тарваташ палемдалтеш. Тыгак акций дене келшен, Параньга районышто Ирнур мечеть кумдыкым эрыкташ тӱҥалыт. А теве Волжск кундемыште пашам ыштен кертдыме-влаклан экскурсий-влакым эртараш палемдыме. Тыгак нуным театрлашкат луктыт. Тиде годымак Марий кугыжаныш технике университетыште йоча да шоҥго пӧртлан полышым пуымо дене кылдалтше вургемым да модышым погымо паша кая. Поро паша дене кылдалтше йоча-влаклан эше ик проект ямдылалтеш. Тиде Йошкар-Олан рӱдӧ каныме паркыштыже «Йоча пагытын отрожо» мероприятий эрташ тӱҥалеш. Пашам шукташлан 100 тӱжем утлалан грантым сеҥен налме. А проектын тичмаш акше 500 тӱжемыш шуэш.
Аня Левагина
Увер йогын (mp3)