Марий Элыште илыше-влак тылзе еда тӱнямбал права йодыш дене полышлан эҥертен кертыт. Тидын нерген келшымашыш Юл кундем федерал округ Юстиций Министерстве Виктем вуйлатыше Владимир Татарчук да Марий Эл Республикын тӱҥ федерал инспекторжо Илья Акчурин келшымашыш кидпалым пыштеныт. Ушештарена, Депутат кече деч ончыч 22 апрельыште Владимир Татарчук мемнан кундемыш паша вашлиймашым эртарыме сомыл дене толын да Республикысе тӧртыкшот нерген докладым ыштен. Тыге май тылзе гыч приёмлымаш-влакым (приёмым) эртараш палемдыме. Тыгай вашлиймаш-влакым Юл кундемысе федерал округ юстиций Министерстве Виктемын сомылеҥже-влак эртараш тӱҥалыт. Теҥгече Марий кугыжаныш университетын ректоржым сайленыт. Университет вуйлатышын постшылан 3 кандидатура лийын. Тиде Виталий Иванов, Виталий Макаров да Анатолий Смирнов. Шанче каҥаш (Учёный Совет) ончылно нуно шке паша программышт нерген палдареныт. Виталий Иванов университетын илыш негызым (материальный базым) да экономик йодышым пеҥгыдемдыме нерген палемден. Тыгак пединститутын корпусшым чоҥен шуктымо да студент-влаклан у тӱшкагудым чоҥымо нерген ойлен. Виталий Макаров лишыл 5 ий жапыште университет комплекс конкуренцийым эртыше тунемме тӧнеж семын лийшаш, шымлыме паша шукем толшаш, тыгак тунемше-влакын шинчымашыштым келгемдыме нерген ойлен. Анатолий Смирнов инноваций йӧным кучылтын пашам ыштымым палемден. Вузын уставше дене келшен ректорым 5 ий жаплан сайлат. Сайлымашым иктешлен ойлаш гын, 130 шанче каҥаш еҥ-влак кокла гыч 102-шо шке йӱкшым Виталий Макаровлан пуэныт. Тыге университет вуйлатыше Виталий Макаровак кодеш. Каласаш кӱлеш, 2007 ий август тылзыште Россий Виктерын кӱштымыж почеш, таче кечылан Марий кугыжаныш университетыш пединститут да икмыняр техникум пура.
«Марий Эл» фирме поездым кугемдат. Шушаш 1 май пайрем дене кылдалтын Моско ола марте кудалыштше поездыш ешартыш вагоным ешарат. Тыге поезд кужыт 18 вагон марте шуйнаш тӱҥалеш. Да тыгак эше ик рейсым колтымо нерген ой лектын. Йошкар-Ола кӱртньӧ корно вокзал вуйлатышын Юрий Зотинын палемдымыж почеш, ешартыш поезд Йошкар-Ола гыч 19 шагатлан тарвана. А могай кече – тидым ончылгоч билетым ужалыме дене гына пале лиеш.
Спорт чап тоштерыште у статуйым шогалтеныт. Мемнан землячкына, Совет Союзын тале, кумдан палыме спортсменкыже Зинаида Борисовна Дружинина (Воронинан) статуйжын почмашыже «Юбилейный» спорткомплексыште эртен. Зинаида Дружинина гимнастикыште кугу кӱкшытыш шуын. Тудо тӱнямбал, Европо, Совет Союз, Олимпийский модмашын чемпионкыжо, спорт мастер да тыгак «Гимнастикын миссше» да «Мисс Грация» лӱмым сулен налше спортсменка. Спортсменке чылажге 44 тӱрлӧ медаль дене палемдалтын. Зинаида Борисовна Дружининан статуйыжым кумдан палыме марий скульптор Анатолий Ширнин ден Сергей Яндубаев ыштеныт. Каласаш кӱлеш, спорт чап тоштерыште але марте тыгай паша лийын огыл, тидын нерген тоштер вуйлатыше Михаил Шалагин палемден.
24 апрельыште Палантай лӱ меш Республикысе тӱвыра да сымыктыш колледжын 60 ияш лӱмгечыжым палемдаш тӱҥалыт. Тиде кече ден кылдалтын кышкар почеш тунемме тӧнежыште шуко мероприятий эрташ тӱҥалеш. Тиде сымыктыш да тӱвыра колледжыште «Художественное образование: история, традиции, новации» лӱман шанче-практик конференций эрта. Вара тыште тунем лекше-влак дене вашлиймаш лиеш. Да 15 шагатлан пайрем погынымаш почылтеш. Уна-влакым кугу пайрем концерт лиеш.
Аня Левагина
Увер йогын (mp3)