Тений шыжым Йошкар-Олаште черетан 10 финно-угор калык писатель-влакын погынышт эрташ тӱҥалеш. Тиде кугу мероприятийлан ямдылалтме паша каен шога. Шукерте огыл Йошкар-Олашке финн-угор писатель-влак Ассоциацийын президентше Арво Валтон толын каен. Таллин ола гыч толшо уна писатель-влакын Конгресс эртыме нерген йодыш-влакым каҥашен. Ушештарена, 10 финно-угор писатель-влакын погынышт тений сентябрь тылзыште эрташ тӱҥалеш.Мемнан элыште экологий могырым сай огыл регион-влак коклаште рейтинг эртен. Тушто кажне кундемым 15 критерий почеш акленыт. Регион-влакым экосфера, техносфера да социум шотышто тергеныт, иктешлымашым ыштеныт. Рейтинглан ӱшанаш гын, Марий кундем экологий могырым яндар вер-шӧрлан шотлатеш. А уда регион-влак радамыш 14 кундем логалын. Нунын коклаште Коми ден Чуваш республике-влак, тыгак Тюмень, Ульяновск, Свердловск область-влак улыт. Рейтингым «»Ужар патруль» ушем эртарен.
Эртыше кечылаште миллион дене выпускник-влак ЕГЭм кучымо репетицийым эртеныт. Кӱшыл тунемме тӧнежлашке тунемаш пурашлан абитуриент-влак экзаменым кучышаш улыт. Тений ЕГЭм кучымо годым икмыняр вашталтыш пурен. Кажне тунемшылан посна экзамен паша дене пакетым кучыктат. Тиде методикым ямдылыше-влакын палдарымышт почеш, пошкудын вашмутшым возен налаш огеш лий. Тений налме таныккагаз дене (свидетельство дене) 2009 ий марте тунемаш пураш йӧн лиеш. Каласаш кӱлеш, кеҥежым тений тунем пытарыше да ончыч тунем пытарыше-влак экзаменым кучаш тӱҥалыт. Экзамен-влак май кыдал гыч тӱҥалыт.
Йошкар-Олаште бульвар-влак кеҥеж жап дене пашам ышташ тӱҥалыт. «Водоканал» муниципал унитар предприятий пашаеҥ-влакын палемдымышт почеш, Йошкар-Олаште чыла фонтан пашам ышташ тӱҥалшаш улыт. Кызыт специалист-влак Чавайн бульвар да комсомольский уремысе фонтаным тӧрлат да эрыктат. Тылеч посна Карл Маркс уремысе фонтаным ачалат. 2 кече ончыч чӱктымӧ фонтан вӱд лавыран улмылан кӧра пашам ыштымым чарненыт. Садлан ты верыште кызыт вӱдым вашталтат. Фонтан-влакын паша жапышт октябрь тылзе марте шуйнаш тӱҥалеш.
Россий кӧргысӧ ялысе спорт модмашлан ямдылалтме паша каен шога. Кызыт 1 тӱжемат пеле тунемше-влакым ойырат да тренировкым эртараш тӱҥалыт. Туныктыш виктемын палемдымыж почеш, 600 йочасадыш да тӱҥалтыш классыш коштшо йочам да 900 икшывым 10 классыште тунемше-влакым ойырат. Спискым май тӱҥалтышлан ямдылен шукташ палемдыме. А 15 май гыч тренировке-влакым эртараш тӱҥалыт. Ушештарена, Россий кӱкшытыштӧ эртаралтше кугу спорт модмаш тений кенежым, 7 гыч 12 июль марте мемнан кундемыште эрташ тӱҥалеш.
Аня Левагина
Увер йогын (mp3)