Дмитрий Медведев Марий Элыш толшаш. Тидын нерген спорт министерствышке пеҥгыдемдымаш толын. Ушештарена, 7 гыч 12 июль марте Россий кӧргысӧ 7-ше кеҥежымсе спорт модмаш мемнан кундемыште эрташ тӱҥалеш. Лач тиде спорт модмашын почмашкыже шукерте огыл сайлыме Росиий Федерацийын Президентше Дмитрий Медведев толшаш. Спорт модмаште Россий Федерацийын 70 регионжо гыч делегаций-влак толыт. 3000 утла спортсмен, судья да уна-влак лийыт. Спорт министерствын палдарымыж почеш, команде-влак 14 тӱрлӧ спорт модмаште шке вийыштым тергаш тӱҥалыт. Таҥасымаш тӱҥ шотышто Спорт полат кумдыкышто да «Келшымаш» стадионышто эрташ тӱҥалеш. Каласаш кӱлеш, уэмдыме стадион почмашым 24 июньлан палемдыме.Кӱртньӧ корнышто туткар. Тылзе еда кундемнан кӱртньӧ корныштыжо еҥ-влак ӱмырышт дене чеверласат але эмганат. Тидыже корныеҥын тӱткыдымылыкше дене кылдалтеш але подылшо улмыжлан кӧра. 12 апрельыште Волжск оласе Кӧргӧ паша пӧлкаш (ОВД-ыш) «Волжск-Казань» электричкын айдемым тӱкымӧ нерген увер пурен. Туткар лийме верыш миен шумек пале лийын, Волжск олаште илыше София Семёнова кудалше поезд йымак логалын. Поездым вигак шогалтымат ӱдырамашлан полшен огыл, ӱдырамаш чотак эмганен. Кызыт София Семенова Волжск оласе эмлымверыште кия. Да могай амаллан кӧра поезд йымак кайымыжым умылтарен огеш керт. Но корно прокуратурышто туткар лиймым шымлыме паша кая, молан ӱдырамаш тыгай йӧн дене илышыжым лугыч ышташ шонен, иктешлат.
Шочмо гыч оласе пӧртлаште шокшым чарат. Мэрийын пресс-службын палемдымыж почеш, администраций, илышкыл, илыш-касыш (социально-бытовой) пӧртлаште шокшым чарат. Лачак йочасадыште, тунемме тӧнежлаште да эмлымверыште шокшым чараш огыт вашке. Игечым эскерыше-влакын увертарымышт почеш, кундемна мучко игече ояр шога. Йӱжын температурыжо йӱкшемме да кылмыктыш лийшаш огыл манын, палемдат.
Тунем лекше-влакын ончыкылык паша верышт пале. Марий кугыжаныш университетын педагогика да психологий факультетыштыже тачысе кечылан кугу йодмаш дене пайдаланыше дефектолог-влакым ямдылат. Тыгай специалист ни Кировышто, ни Чебоксарыште уке. Тений тиде пӧлкам 19 ӱдыр тунем лектеш, тышечын 11 «йошкар» дипломым налаш ямдылалтыт. Тунем лекше ӱдыр-влакын паша книжкашт уло. Стажышт идалыкат пеле гыч 3 ият пеле погына. Нуно тунемме жапыште пел кече тунемыныт гын, вара пашам ыштеныт. Кодшо кечылаште тиде факультетыште пытартыш йыҥгыр шергылтын. Выпускник-влак шке туныктышышт, ончыкылык пашавер гыч вуйлатыше-влак дене вашлийыныт, тыгак южыжын ача-аваже толыныт. Каласаш кӱлеш, дефектолог специальность дене специалист-влакым шуко вере вучат. Тиде Волжск, Шернур, Курык марий, Медведево кундемлаште, тыгак Йошкар-Олаштат. Палемдыман, шке тӱҥ специальностьшо дене 16 еҥ ончыкылык паша вержым тачысе кечылан пала. Тидыже тачысе саманыште ӧрыктарыше факт семын аклаш лиеш.
Шӧртньӧ мадаль - радио-механический техникумын ӱдыр-влаклан логалын. Марий Элыште волейбол дене первенстве эртен. Иктешлыме модмаш капкультур пеҥгыдемдыме «Спартак» спорт комплексыште эртен. Ӱчашымаште 12 команде лийыныт. Тышечын 6 командыже финалыш логалын. Каласаш кӱлеш, 2 командыште 8-9 классыште тунемше ӱдыр-влак лийыныт. Волейбол дене пӧръеҥ-влак утларак модыт. Тидын нерегн таҥасымашын тӱҥ судьже Виктор Дорохов палемден. Каласаш кӱлеш, волейбол дене первенстве эртыме годым 22 пӧъеҥ команде лийын. Тидыже ӱдыр-влак команде дене танастараш гын, 2 пачаш шукырак лиеш. Волейбол дене модмаш первенстым иктешлымеке, 1 верым радио-механический техникумын ӱдыр-влакше налыныт, 2 верым – Политехник университетын ӱдыр-влакше. А той медаль - Марий кугыжаныш педагогик институтын ӱдыр-влакшылан логалын.
Аня Левагина
Увер йогын (mp3)