Кодшо кечылаште Марий Элыште илыше-влак марий парламентын спикерже дене вашлийын мутланеныт. Тидын нерген Парламент сайт увертара. Мер-политик рӱдерышке Кугыжаныш Погынын депутатше дене вашлиймашке 16 миеныт. Тиде У Торъял, Провой кундем гыч да Йошкар-Ола гыч лийыныт. Нуно тургыжандарыше йодышым Юрий Минаковлан пуэныт. Йодыш-влак тошто пӧрт-влакым пужымо нерген, ветеран-влаклан илышкыл полышым пуымо нерген лийын. Тыгак коммунал-илем суаплыклан льготым палемдыме йодышым нӧлталыныт. Каласаш кӱлеш, пурышо йодыш-влакым лончылымо да шуктымым Юрий Минаков шкеже тергаш тӱҥалеш. Тачысе кечылан, кӱлеш ведомствыш да министерствыш колташлан серыш-влакым ямдылыме.Инвалид-влаклан полыш шотышто вашталтыш лиеш. Россий виктерын лекше у пунчалже инвалид-влакын илышыштым мыняр-гынат куштылемдышаш. Республикысе суд медицине экспертизе бюро вуйлатыше Анатолий Татанкинын мутшо почеш, инвалид группым налашлан чер-влакын спискыштым ямдылыме. Тушто 23 пунктым палемдыме. Тыгак инвалид-влаклан у протезым ыштыме радам вашталтын. Ончыч тошто протезым вашталташлан инвалид-влак уэш медкомиссийым эртеныт гын, ончыкыжым тиде пашам справке почеш гына ыштен кертыт. Тидлан черле еҥ шке поликлиникыштыже кӱлеш справкым налшаш. Тудын дене келшышын, инвалидлан у протезым ямдылаш тӱҥалыт. У пунчал тений 1 октябрь гыч илышыш пурышаш.
Марий Элын тӱҥ капиталышкыже кугу йӧнозанлык предприятий-влакын инвестиций кугытшо 55%-лан кугемын. Тидын нерген Республик кучем сайт увертарен. 2008 ийын икымше квартылым ончымаште 789,9 миллион теҥге лийын. Тиде шийвундо тӱҥ шотышто у оборудовнийым налашлан ойыралтеш. Вияҥ толшо прдприятий-влакым ончымаште «Ариада», «Акашевский кайык фабрике» да молымат палемдаш лиеш.
15-16 майыште эн сай вожатыйым ойыраш тӱҥалыт. Тидын нерген Йошкар-ола администрацийын пресс-службыжо увертарен. Йошкар-Оласе туныктыш Виктем «Идалыкын вожатыйже» конкурсым увертарен. Конкурсан-влакын туныктымо да йочам шуарыме пашаште шкем кучен моштымым, паша опытыштым да йоча дене ваш кылым ыштен моштымым жюри аклаш тӱҥалеш. Конкурсышко ушнышо-влак, тӱҥ шотышто, тунемме тӧнежлаште пашам ыштыше вожатый-влак лийшаш улыт. Ты годым нунын паша стажышт кум ий лийшаш. Конкурсын тиде ужашыштыже сеҥышыш лекше-влакым республик кӱкшытыштӧ эртыше «Чонем пуэм йоча-влаклан» конкурсышко логалын кертыт. Да «Старший вожатый» лӱмлан таҥасаш тӱҥалыт.
Шушаш каныш кечылаште Марий Эл республик «Тӱнямбал келшымаш куржталмаш» эстафетышке ушна. Шуматкечын эрдене Чуваш чекыште мемнан спортсмен-влак тӱнямбал эстафетым вашлийыт да Кокшайск тракт дене Йошкар-Олашке толыт. Вара Провой кундем гоч пошкудо Татарстан республикыш ужатат. Минспортын палемдымыж почеш, тыгай тӱнямбал эстафета 1987-ше ий гыч эртаралтеш. Тудо Европо, Азий, Африка, Австралий да Америкыште чылаже 70 утла эл гоч эрта. Эстафетыште олимпийский спортсмен-влак йӱлышӧ факелым кид гыч кидыш пуат. Тидыже тӱжем дене меҥгым куржтал эрташлан кумылым ончыкта. Эстафетын тӱҥ шонымашыже - уло тӱнямбалне икте-весым умылен да ваш келшен илымым пеҥгыдемдымаш.
Аня Левагина
Увер йогын (mp3)