Йоча-влакын кеҥежым каныме верышт шагалем толеш. Тений кеҥежым 330 тазалыкым шуарыме да каныме тӧнеж пашам ышташ тӱҥалеш. Тышечын 23 ола ӧрдыжтӧ, 244-ше – школ пелен, 57 – профильный лагерь лиеш да 6 йоча санаторий улыт. Тидын нерген Роспотребнадзор Виктем пресс-службо палдара. Кодшо ий дене таҥастарымаште тений ыштышаш каныме тӧнеж-влак 16 лагерьлан шагалрак лийыт. Тидыже июнь тылзе гыч школлаште ачалыме паша тӱҥалме дене кылдалтеш. Каласаш кӱлеш, тений каныме да тазалыкым шуарыме тӧнежлаште 88,5 школышто шинчымашым погышо йочан тазалыкшым пеҥгыдемдаш палемдыме. Тӱшка ончымаште – тиде 84% лиеш. Палемдыман, тиде показатель кодшо ий дене ончымаште 1167 тунемшылан шукырак. Лагерьым кеҥеж жаплан ямдылыме паша годым, эпидемий ылыжме ваштареш профилактикым да санитар-гигиене пашам эртарат. Тачысе кечылан 70 % утла ыштышаш пашам шуктымо. Ачалыме пашалан ойырымо 21 миллион 993 тӱжем теҥге гыч 65 % кучылтмо. Тидыже 14 миллион 296 тӱжем теҥгеш шуэш. Тыгак лагерьлаште палемдыме пашам шуктымым эскерен шогат. Кеҥеж жапыште тазалыкым шуарыме тӧнежлаш каяшлан ик путевкын акше 7 200 теҥгеш шуэш.12 майыште тӱнямбал медшӱжар кече вашеш Йошкар-Олан медколледжыште пайрем эртен. Тиде кечылан пӧлеклалтше пайрем кажне ийын ты тунемме тӧнежыште эртаралтеш. Тыште туныктышо да студент-влакын сай паша лектышым ончыктымыштым палемденыт. Идалык мучко ойырен налме теме-влак почеш шымлыме пашам возымым иктешленыт. Тыгак «Марий кундемыште медшӱжар пашан историйже» шымлыме пашан докладшым колыштыныт. Ӱпӧ олаште Юл кундемысе медшӱжар-влакым ямдылыме конкурсыш мийыше Ксения Быкова еш идалык нерген студент-влаклан палдарен. Каласаш кӱлеш, Йошкар-Оласе медколледж дене 18 да 30 № школ-влак кылым кучат. Тышке школышто тунемше-влак шинчымашыштым пойдараш коштыт. Тений тиде тунемме тӧнежым 200 наре выпускник тунем лектеш. Тыгак отделений вуйлатышын Нина Плотникован палдарымыж почеш, шинчымашым келгемдаш манын кӱшыл тунемме тӧнежлашке 10-15% тунем лекше-влак каят.
«Пытартыш йыҥгыр» марте выпускник-влак 4 кугыжаныш экзаменым кучен шуктат. Кышкар дене келшен, ЕГЭ экзамен 16 числаште йот йылме дене тӱҥалеш. Да кечыште 2 экзамен дене эрташ тӱҥалеш. 24 май марте выпускник-влак иформатике, химий, обществознаний, Россий историй, физике да марий литератур дене экзамен-влакым кучен шуктат. Вара, 26 май гыч 11 июнь марте моло тунемме прдмет дене экзамен-влак эрташ тӱҥалыт. Тунемме пашаште аттестацийым эртарыше рӱдерын палемдымышт почеш, икымше экзаменын лектышыжым аклымаш 19 май деч вара пале лиеш. А моло экзамен иктешлымаш-влак экзамен деч вара 3-4 кече гыч мемнан кундемышкына толын шуыт. Май-июнь тылзыште кундемна мучко ЕГЭм кучымо вер 45 лиеш. А июль тылзыште – 2. Тиде Марий кугыжаныш университет да Марий кугыжаныш политехник университет.
Водолаз-влак вӱд воктенсе верым эрыкташ тӱҥалыныт. 13 майыште Шап ер пундаш гыч кодшо кеҥеж каныме жап гыч кодшо шӱкым эрыктен луктыныт. Тылеч ончыч тыгак Таир ерым эрыктеныт. Марий Эл республикысе кычалше да утарыше службын палдарымыж почеш, водолаз-влаклан 2 арня жап пуалтын ер-влакым да вӱд воктене каныме верым шӱк деч эрыкташлан. Ушештарена, Марий Эл мучко 5 муниципал вӱд воктене каныме вер да 29 санаторий да профилакторий пелен каныме вер-влак улыт. Рӱдо паркын каныме верыштыже вӱд воктенсе ужашыжым шушаш арняште эрыкташ тӱҥалыт, тидын нерген специалист-влак палемдат.
«Георгивский тасма» 22 июнь марте кундемыштына лойгалташ тӱҥалеш. Тидын нерген акцийын организаторже-влак палдарат. Сарыште вуйым пыштыше-влакым шарныме кече лӱмеш 6 тӱжем наре Сеҥымаш кечын символжым пуэдаш палемдыме. Тачысе кечылан Марий Эл республикыште илыше-влаклан 400 тӱжем гыч 382, 5 тӱжем тасмам пуэдыме. Тиде пашашке 2000 наре волонтер-влакым ушненыт. Нуно ик еҥлан тасма дене пуэдаш тыршеныт. Но тиде годым исключенийат лектын. Теве мутлан волонтер деч ик пӧръеҥ 21 тасмам йодын. Тудо йочасадысе икшыве-влаклан манын. Да ты годым шке документшым ончыкташ ямде лийын.
Аня Левагина
Увер йогын (mp3)