Россий Президентын палемдымыж почеш, Юл кундемысе федерал округышто - у ӱшан еҥ. Тидын нерген Юл кундемысе федерал округын официальный сайтше палдара. Александр Коноваловым Россий Федерацийын юстиций минситрлан шогалтымек, Дмитрий Медведев Григорий Рапотым Юл кундемысе федерал округын ӱшан еҥжылан палемден. Григорий Рапот – 64 ияш улеш. Разведке Службо вуйлаштышын алмаштышыже должность гыч тӱҥалын да Россий Президентын Кечывалвел федерал округын полпредше марте шуын. Тиде жап коклаште Лӱдыкшыдымылык Совет секретарьын алмаштышыже, Россий Федерацийын торгайымаш, йӧнозанлык да шанче паша министрын икымше алмаштышыже. 2001 ий гыч Евразийысе экономике тӱшкерын (сообществын) тӱҥлӧ сектетарьже (генеральный секретарьже) пашам шуктен толын. Йошкар-Олаште 89 лифт пашам ыштымым чарнен. Тидын нерген Ростехнадзор Виктем палдара. 7 май марте тергымашым эртарымек, специалист-влак тыгай цифрым палемдат: паша ыштыме жап шотым ончымаште 24 лифтын паша жапше лектын, а черетан тергымашым 44 лифт эртен кертын огыл. Апрель тылзыште тергымашым эртарыме деч вара, «Лифтсервис» пашаеҥ-влак тӧрлымӧ пашам шуктен толыныт. Тыге 3 лифт пашам ышташ тӱҥалын. Ушештарена, тений пӧрталште лифт-влакым тӧрлымӧ пашам илыше-влак шке вийышт дене ачалаш тӱҥалыт. Чоҥымо паша шотышто министрын Наиль Михайловын палдарымыж почеш, рӱдер 364 миллион теҥгем ачалыме пашалан ойырен кертеш. Республик да оласе бюджет гыч ойырым шийвундым иктыш ушен, окса полыш кугыт 600 миллионыш шуэш. Каласаш кӱлеш, тиде окса лифт-влакым гына тӧрлашлан огеш ойыралт. Тыгак Йошкар-Оласе тӱшкаилем озанлыкым (коммунальный хозяйствым) ачалашлан ойыралтын.
Республикыштына «Йоча-влаклан - кугыеҥ-влакын полышыштым» лӱман акций тӱҥалын. Тудо неле илыш условийыште илыше еш-влаклан пӧлеклалтын. Акцийыш министерстве да ведомстве-влак гына огыл, правам аралыше, тӱрлӧ верам кучышо ушем да психологий рӱдер-влак ушненыт. Кӱлеш сомылым пырля шукташлан лӱмын паша группо-влакым погымо. Акций кок этап дене эрташ тӱналеш. 18-ше май марте республикыште нелын илыше чыла еш-влак нерген уверым погат. Тидлан специалист-влак начарын илыше-влак деке пӧрт еда кошташ тӱналыт. Нуно илымвер условийым, ача-аван илыш-кыл (социальный) положенийыштым ончат. Кокымшо йыжыҥыште еш-влак дене паша тӱҥалшаш. Нунын дене специалист-влак лишкырак палыме лийыт, ешысе проблеме-влакым рашемдаш полшат.
«Финно-Угорын миссше» лӱмым Марий Эл гыч ӱдыр сеҥен налын. 13 майыште Мордовийыште Регион-влак кокласе самырык тукымын да студент-влакын «Шумбрат!» фестиваль кӧргыштӧ «Мисс Финно-Угрия - 2008» моторлык конкурсын финалже эртен. Ончыл верышке Марий Эл гыч Наталья Бычкова лектын. Сеҥышыш лекше Наталья Бычковалан Россий кукшытыштӧ эртаралтше моторлык конкурсыште лияш пиал верештын. Кокымшо верым одо вел ӱдыр – Мария Балашова сеҥен налын, Кумымшо верым мордва да эстон ӱдыр-влак пайленыт. Тиде Людмила Лычева да Кейт Тотси. Тидын нерген Мордван информаций агенствыже увертарен.
Андрей Эшпай шочмо кундемыштыже. Кумдан палыме «А снег идёт», «Мы с тобой два берега у одной реки» руш мурын, тыгак «Приходите завтра» кино гыч мурсем-влакын семмастарже Андрей Яковлевич Эшпай улеш. Кодшо кечылаште, 15 майыште тудо лӱмгечыжым палемден. 60 утла кинон да 20 утла театрыште шындаш йӧршӧ сем-влакым келыштарен. Каласаш кулеш, 83 ияш семмастарын пытартыш ямдылыме пашаже тиде эргыжын, Горький лӱмеш киностудийын режиссерын киножлан семым келыштармаш. Симфоний йӱк дене 16 сериян кином сылнештараш куштылгыжак огыл. Но композитор Андрей Эшпай тиде пашалан лӱдде пижын. А шочмо кундемыштыже палантай лӱмеш тӱвыра да сымыктыш колледжыште тудын возымо симфонийжым йоҥгалтареныт.
Аня Левагина
Увер йогын (mp3)