Йошкар-Олаште 29-30 майыште Тӱнямбал конгресс кышкарыште «Туныктымаште увер технологий» конференций эрта. Шанче конференций икмыняр йогыным авалта. Тиде информатикылан туныктымо теорий да методика, туныктымаште увер технологийын верже да тулеч молат. Пленар каҥашымаште 5 докладым колышташ палемдыме. Нунын коклаште Галина Швецован «Марий Элысе туныктымо системыште увер технологийын ойыртемже» докладше. Конференций жапыште 4 секций да 3 йыргешке ӱстел пашам ышташ тӱҥалеш.

«Тек йоча йӱк яндарын йоҥга» 1 июнь йоча-влакым аралыме кече. Тиде кечын кундемна мучко йоча-влаклан пӧлеклалтше тӱрлӧ пайрем-влак эртат. Теве ик тыгай пайремым Йошкар-Оласе рӱдӧ каныме паркыште эртарат. Икымше йоча каналлан - ик ий. Диван-ТВ каналыште ТелеНяня-влак йоча-влакын йӧратыме геройышт улыт. Лачак нуно 1 июньышто каныме верыште икшыве-влакым куандараш тӱҥалыт. Рӱдӧ каныме паркыште иканаште 2 верыште йоча-влаклан конкурс, модыш, эстафет-влак эрташ тӱҥалыт. 17 шагат гыч рӱдӧ каныме верын «Карусель» куштышо ансамбыльын иктешлыше концертше лиеш. Нуно калык лӱмым сулен налмым пеҥгыдемдат. А 2 июньышто Тулото аланыште лагерь тургым почмаш лиеш. Тышке вуйвер да туныктыш виктем гыч специалист-влак толыт.

«У программым Морко кундем кӱлынак кучылтеш!» Илышыш «Олам да яллам тӱзатыме да волгалтарыме» кугыжаныш программым пуртымо. Тидын дене келшен, районлаште семинар-влак эртат. 4 июньышто Морко кундемыште семинар лийшаш. Тышке Марий Эл Виктер гыч специалист да кундемысе район администраций вуйлатыше-влак толшаш улыт. Семинар годым, Морко администраций вуйлатыше кундемым тӱзатымаште пашам шуктен толмымо нерген палдараш тӱҥалеш. Толшо-влаклан лӱмын 15 минутан Морко кундем нерген кином ямдыленыт. Верысе администраций тӱзатыме пашам шуктен. Теве тӱвыра полат ончылно тротуарым брусчатке дене оптеныт. Корным тӧрленыт. Тыгак поселок покшелне верланыше «Энсул» ерым эрыктеныт. А 4 июньышто тиде верыште фонтан пашам ышташ тӱҥалеш. Кундемым тӱзатыме программе дене келшен чиялтыме пашамат ӧрдыжеш коден огытыл.
...