«Йочам чер деч утараш». Тыгай шонымаш дене 1 июньышто, йочам аралыме кечын Йошкар-Олаште концерт эрташ тӱҥалеш. «Йоча-влаклан - донор» волонтёр группа, вӱр рак чер дене черланыше йоча-влаклан полышым пуаш шонен концертым эртара. Тыгай шонымаш дене концертым эртарашлан кундемыште палыме «Миру-мир», «Блокада» группа-влак, Екатерина Гинзбург ушненыт. Концерт эртарыме шийвундым оласе йоча эмлымверын онкогематологический пӧлкашкыже пуат. Палемдаш лиеш, «Йоча-влаклан-донор» волонтёр группа кажне ийын йоча-влакын черже нерген йодышым нӧлталыт. Да калыкым полшаш ӱжыт. Кажне ийын 25-26 изи йочан специалист-влак вӱр рак черым муыт. «Йоча ракым эмлаш шуко жап да чытымаш кӱлеш» - тыге эмлызе-влак палемдат.«Йоча але арака?» Тыгай йодышым кажне кечын гаяк Мари-Турек район Александровка ялыште илыше 26 ияш ава шынден. Чаманен каласаш логалеш, чӱчкыдынжо 3 икшывыже улмыжо нерген йӧршынат монден. Арака тудлан шергырак лийын. Йоча-влакым ончаш, туныкташ, шуараш, тазалыкыштым эскераш, эсогыл пукшаш кӱлмӧ нерегнат чӱчкыдын монден. Мари-Турек проокуратура, икшыве-влакым шала ӱдырамаш деч поген налын. Кок кугырак эргыжым (эн кугужлан 7 ий) Йошкар-Оласе «Тёплый домыш», а ик ияш ӱдыржым ньога пӧртыш колтымо, а аваже ваштареш уголовный пашам тарватыме. Уверым республикысе прокуратурын сайтше гыч налме.
Салтакыште лийме жап кӱчыкемын, но наҥгайыме жапше кужемын. Тений ийгот дене шушо чыла самырык рвезым ик ий жаплан салтакыш наҥгаят. Шошо призыв мучашлалтме марте эше тылзат пеле кодын. Палемдена, салтакыш наҥгайымаш 15 июль марте шуйнаш тӱҥалеш. Сарзе комиссариатын палемдыме почеш, салтакыш ӱжмӧ 90% самырык рвезе иктаж-могай амаллан кӧра кайыде кодын кертеш. Но туге гынат, вуеш шушо эрге-влак салтакыш кайынешт. Тидыже рвезе-влакын шке праваштым палыдыме дене кылдалтын але шке шонымо почешышт рвезе-влак салтак корныш каят.
Тений школым шӧртньӧ медаль дене тунемын пытарыше-влак шагалрак улыт. Тидыже школ дене чеверласыше-влакын чотышт денат кылдалтын. Сай отметкылан тений школым 460 тунемше пытарышаш. Тышечын 166 еҥже шӧртньӧ медальым, а 300 наре тунемше - шийым налшаш. Но куанаш але эр. Ончылно иктешлыше кугыжаныш экзамен-влак улыт. Туныктыш министерствыште палемденыт: школым тунемын пытарыше-влак кугыжаныш экзаменыште шке медальыштым чылан огыт пеҥгыдемде. Тений ВУЗлашке тунемаш пурымо годым медаль дене пытарыше-влаклан льгот йӧн аралалтеш. А вес ийыште тудым вашталтышаш улыт.
«Оласе транспортлан ак кӱза». 1-ше июнь гыч маршрут такси дене кудалмылан 10 теҥгем огыл, а 11 теҥгем тӱлыман. А автобус ден троллейбуслан ак огеш вашталт, ончычсо гаяк 8 теҥге. Палемдыман, оласе транспортлан ак пытартыш гана идалык тӱҥалтышыште кӱзен. Ончыкыжым ий мучаш марте тудо шергештшаш огыл. Республикысе экономик министерствын палемдымыж почеш, ак шотышто 2008 ийлан тарифым ыштыме годым, оласе транспортлан ак шергештмым ончыктеныт. Тунам маршрут таксилан 11 теҥге марте кӱзыкташ палемденыт.
«Изи марафон стартым пуа». Йӱла почеш Йошкар-Олаште кажне ийын изи марафон эрта. Тений тудо 1 июньышто лиеш. Кумылан-влак Шап ер марте 21 меҥгым куржшаш улыт. Ты марафон Йошкар-Олаште тений 26-шо гана эртаралтеш. Кажне гана тушко 500 наре спортсмен погына. Тушко Марий кундемысе спортсмен-влак гына огыл, тыгак пошкудо регионла гычат толыт. Марафонышко толшо кажне участникын тазалык шотышто справкыже лийшаш. Машинам виктарыше-влаклан ушештарена: марафоным эртарыме кечын, 1-ше июньышто, Йошкар-Олаште Комсомольский, Волкова, Хасаново, Карл Маркс лӱмеш уремыште, Ленин проспектыште да Кокшайск трактыште кечывал марте корно петырыме лиеш.
Аня Левагина
Увер йогын (mp3)