«Сайын тунемат гын, Россий президент дене вашлият». 23 июньышто Моско олаште школым тунем пытарыше-влаклан Кугыжаныш Кремль полатыште Кугу бал лийын. Туныктыш министерствын палдарымыж почеш, Марий Эл гыч 4 еҥ тушко каен. Тиде Йошкар-Оласе 6 ден 28 школын, лицей-интернатын да Оршанка кыдалаш школын тунем лекшыже-влак улыт. Нуно тунеммаште гына огыл, тыгак спорт дене кылым кучымаште, тӱрлӧ конкурслаште шкеныштым сайын ончыктеныт. Паша кышкар почеш, школым тунем лекше ӱдыр-рвезе-влаклан торжественно вашлиймаш Сапожковский площадьыште лийын. Тылеч вара палыдыме салтакын шӱгарышкыже пеледыш пышташ каеныт. Тыгак эстрада шӱдыр-влакын концертышт, 6 шагат эр марте каныме кас лийын. «Тоштым - кораҥдаш, тӧрлаш лиймым - ачалаш». Олмыктымо пашам Марий Элыште шукташлан федерал бюджет гыч 1 миллиард 250 миллион теҥгем ойырымо. Тиде паша «Россий граждан-влаклан илымвер» кугыжаныш программме почеш 2011 ий марте шукталташ тӱҥалеш. Тидын годым илаш йӧрдымӧ тошто пӧрт гыч илыше-влакым вес вере кусараш тӱҥалыт. Палемдена, федерал рӱдер регион да мунициапал кундем бюджет да илыше-влак дене пырля иквереш шуктышаш. Республикысе кучем сайтын увертарымыж почеш, пачер оза-влак ачалыме пашам шукташлан тӱшка окса кугыт гыч 5%-шым тӱлаш тӱҥалыт. Кызыт кундемышкына 160 миллион тенге толын. Лишыл жапыште коммунал-илем озанлык (жилищно-коммунальный хозяйство) фонд 10 муниципал кундем да оласе округ гыч оксам ойырымо нерген пунчалым луктеш.
«Столица» кугыжаныш программым шуктымаш шинчам куандара». Тиде программе кундемыштына икмыняр ий пашам ышта, да лектышыжат шинчалан коеш. Ола кӧргым гына огыл, тыгак эҥер сер воктенсе верымат тӱзатат. Теве мутлан, Какшан сер йӧршын у сыным налеш. Тыште серым пеҥгыдемдат, Воскресения Христово и Благовещенья черкым нӧлтат. Тораштак огыл официально-деловой рӱдерым чоҥат. А эҥерын шола велныже вес район кушкеш. Тачысе кечылан тыште чоҥымо паша каен шога. Лач тидыжым президент Леонид Маркелов шкежак терга. Ончылно эше кугу паша уло. Тыште йолешке-влаклан корным оптыман, понар меҥгым шогалтыман, тыгак канаш шинчаш верым да моло пашамат ышташ кӱлеш. Какшан серын ик эн тӱҥ сӧраллыкшылан Благовещений храм шотлалташ тӱҥалеш. Воктеныжак Пресвятая Дева Мария да кидыштыже Иисус йочаже скульптура верланаш тӱҥалеш.
7-ше кеҥежымсе спорт модмаш марте жап шагал кодын, а тидыже утыр тургыжландарыкта. Кодшо кечылаште террор ваштареш кучедалше комиссий толшаш таҥасымаш нерген каҥашпогыным эртарен. Мэрий пресс-службын палдарымыже почеш, 6 июль гыч элкӧргӧ паша виктем да кундемысе пӧлка пашаеҥ-влак службым шуктен толмо дене тӱткытым шукырак ойыраш тӱҥалыт. Паша кышкар почеш, аралыме да эскерыме пашам кучем орган полатыште, медицин, туныктыш тӧнежлаште да тыгак йоча садлаште утыр вияҥдат. Кызыт пашаеҥ-влак ӱчашымаш вер-влакым, тудын кумдыкыштыжо улшо илыме верым шымлат, тергат. А Спорт модмаш эртыме годым тиде верлаште техник йӧн-влакым да пий-влакым кучылташ тӱҥалыт.
«Тӱнямбал Олимпийский кечым спорт таҥасымаш дене вашлийына». 23 июньышто Йошквар-Олаште II-шо кеҥежымсе спорт модмаш эрта. 2 кече жапыште 12 тӱрлӧ таҥасымаш «Дружба» стадионышто лиеш. Лач механизатор-влак коклаште да ийын кайыме дене ӱчашымаш гына огеш лий. Кундемна мучко 14 команде йодмашым пуэн, чылажге 555 еҥ вийыштым тергаш тӱҥалыт. Тиде ӱчашымаш Россий кӱкшытыштӧ эртаралтше 7-ше кеҥежымсе ялысе спорт модмашын генеральный репетицийже семын эртаралтеш. Ты годымак тыгак уэмдыме стадионышто у оборудований-влакым пашате тергат. А 24 июньышто 6 шагат кастене «Дружба» стадионым торжественно почмаш лиеш. 12 тӱжем ончаш толшо-влакым футбол матч вуча.
Аня Левагина
Увер йогын (mp3)