30-шо октябырьыште «Сургут Марий ушемын» черетан погынымашыже эртыш.Мутланымашын тӱҥ шонымашыже тыгайрак лийын: ушемын лончыкшым (составшым) уэмдымаш да кугемдымаш, Сургут олаше марий ансамбыльым чумыраш; 7-ше октябырьыште шушаш марий концертлан ямдылалташ, Марий Эл гыч толшо артист-шамычым сайын вашлиймаш.
Икымше йодыш почеш: ты гана ушемын рӱдышкыжӧ кок у еҥ ушнен, шкаланже пашам ойырен.
Кокмышо, Сургут марий-влакын шке фольклор ансамбыльыштым чумырымо нерген кутырен келшыме. Верысе администраций репетицийым эртарашлан верым муымо шотышто полышым пуаш сӧрен. У анасамбыльын лӱмжым рашемдымаште шуко оҥай темлымаш лийын, мутлан: «Хантымарий ансабль», «Шокшо лум», «Тӱтыра вошт», «Обьмарий», «Мӱндыр шӱдыр» да тулеч молат. Нунын кокла гыч иктыжым вес вашлиймаште йӱклен ойыраш кутырымо.
Кумшо йодыш – тиде 7-ше ноябырьыште 18 шагатлан Сургут ола, Ленинградская урем, 9 пӧрт адрес дене марий концерт лиеш. Муро кумылыштым Марий Элын артисше-влак пӧлеклат: Р.Данилова, А.Османова, А.Егошин, С.Пчёлкин. Ты касыште «Сургут Марий ушемын» чумырымо у ансамбыль шке икымше номержым аклаш темла. Сургут район Фёдоровский посёлкысо «Сибирь марий» ансамбыльат толшо уна-влакым тауштен весела куштымашым ончыкта.Ты йодыш-влак деч посна мут лекте «Марий ушемын» йыжъеҥ-влаклан членский билет кӱлмӧ да тӱрлӧ паша вораҥдымаште кучылташлан полыш надыр яшлыкым ыштыме нерген.
Вес тыгай вашлиймаште ушемын да ансамбыльын ончыкылык ик ияш пашаже шотышто планым ямдылаш палемдыме.
Раисия Сунгурова