Уло мыйын шкемын Юмо

Владимир Иванов

Агытан ден помыжалтын,
Шошо кече ончалеш.
Корно дене шыргыжалын,
Поп пашашке кудалеш.

Тарватен кая пуракым –
У теҥге гай лимузин.
Шоналтем, ончен йолашым:
Шерге мо тудлан бензин?

Юмылташ гына чот шерге,
Кумалеш тыршен Назар.
Ӧрдыж гыч ончет гын – черке,
А пурет гын, шем пазар.

Ужамат тыгай сӱретым,
Шинчавӱд гына чыпча.
Кӧ мылам ойла вашмутым,
Кушко Юмыжо онча?

Кушто сулыкшо, суапше,
Кушто шулдо, шерге ак?
Кеч кӱза кӱш черкын чапше,
Чын йӱла лийшаш тугак.

Черкыш ынде корно йомын,
Шӱгарлаш гына коштам.
Кас марте мый тушто кодын,
Кайык мурым колыштам.

Ылыжеш кӱсото тумо,
Шодо эрыкын шӱла,
Шӱмыштемже уло Юмо,
Чоныштем ила йӱла.

"Уло мыйын шкемын Юмо" (mp3) скачать dle 10.2 КиноСвин
Автор: user | Дата: 6 июня 2008 | Просмотров: 3239 Коментарии: 3
#1 написал: андрей (7 июня 2008 05:20)
сайн возет!!!
Эше возо.
кушечын тиде автор?
    #2 написал: Yashkelde (8 июня 2008 05:21)
    Волжский район гыч
      #3 написал: андрей (9 июня 2008 00:46)
      Чап сола гыч? Кызыт тиде агул Пызыргубыш пура.
      Тусо калык чий йўлам йоршеш монден..(((
          • Для того чтобы написать комментарий к этой новости, пожалуйста, нажмите сюда.


          Яндекс.Погода Яндекс.Метрика
          Архив новостей
          Популярные новости