Владимир Иванов

Агытан ден помыжалтын,
Шошо кече ончалеш.
Корно дене шыргыжалын,
Поп пашашке кудалеш.

Тарватен кая пуракым –
У теҥге гай лимузин.
Шоналтем, ончен йолашым:
Шерге мо тудлан бензин?

Юмылташ гына чот шерге,
Кумалеш тыршен Назар.
Ӧрдыж гыч ончет гын – черке,
А пурет гын, шем пазар.

Ужамат тыгай сӱретым,
Шинчавӱд гына чыпча.
Кӧ мылам ойла вашмутым,
Кушко Юмыжо онча?

Кушто сулыкшо, суапше,
Кушто шулдо, шерге ак?
Кеч кӱза кӱш черкын чапше,
Чын йӱла лийшаш тугак.

Черкыш ынде корно йомын,
Шӱгарлаш гына коштам.
Кас марте мый тушто кодын,
Кайык мурым колыштам.

Ылыжеш кӱсото тумо,
Шодо эрыкын шӱла,
Шӱмыштемже уло Юмо,
Чоныштем ила йӱла.

"Уло мыйын шкемын Юмо" (mp3)