Лӱмгече календарьӰарня тылзын коло кумшо кечынже метеоролоийын тӱнямбал кечыже. Тиде кечын 1950-ше ийыште метеорологий ушем пашам ышташ тӱҥалын.
Тиде кечынак 1927-ше ийыште актриса да мурызо Майя Тимофеевна Романова шочын. 42 ий наре тудо Марий кугыжаныш театрын сценыже гыч калыкым шке мастарлыкше дене куандарен шоген: 100 утла рольым чоҥен. Поснак муро-влакым йонгалтарымыж дене кугу чапым сулен. 50–80–ше ийлаште Майя Романова Марий сценын чолга шӱдыржӧ лийын. Калык кызытат тудым «Марий шӱшпык» лӱм дене шарна. Россий Федерацийын сулло артисткыже.
1950-ше ийыште Кострома олаште туныктыш пашаеҥ Галина Александровна Фролова шочын. 1981-ше ий гыч Йошкар-Оласе 16 №-ан профессионал училищышке мастерлан тыршаш толын, а 8 ий гыч тиде тунемме тӧнежым вуйлаташат тӱҥалын. Марий Элын калык туныктышыжо.
Таче Йошкар-Олаште шочын-кушшо чоҥышо Фёдор Борисович Ананьевын 55 ияш лӱмгечыже. «Марийскгражданпроект» институтышто 1977-ше ий гыч инженерлан пашам ышташ тӱҥалын. 11 ий ончыч тиде институтым вуйлаташ шогалын. Россий Федерацийын почётан чоҥышыжо.
1959-ше ийыште Морко район Алдысола ялыште бизнесъеҥ Тамара Викторовна Андрианова шочын. Тудынат таче кугу лӱмгечыже. 10 ий наре механик заводышто тыршен. А 1990-ше ий гыч бизнес пашашке куснен: пеледыш-влакым ужалыме ушемым кучаш тӱҥалын.
52 ияш пайремжым вес туныктыш пашаеҥ Вениамин Валерьевич Толстов палемда. Ятыр ий тудо козьмодемьянск олан туныктыш кучемын вуйлатышыжлан шоген: тыгак тусо лицейым вуйлатен. Мер пашаштат Вениамин Валерьевич кугу пагалымашым сулен: 8-ше марий погынын делегатше лийын. Марий Элын сулло туныктыш пашаеҥже.
Калыкын йӧратыме мурызыжо, кумдан палыме артист Станислав Алексеевич Шакиров таче 42 ийым тема. Шочынжо тудо Пошкырт вел Пӱрӧ районысо Кульчубай ялыште. Марий Элышке толмекыже ончыч кугыжаныш филармонийын солистшылан тыршен: кумдан чапланыше «Мари» группым чумырен. Марий эстрадын ик эн чолга шӱдыржӧ. Марий Элын калык артистше.
Ӱарня тылзын коло кумшо кечынже Анастасия, Василиса, Виктор, Галина, Леонид, Нина, Павел, Серафим, Федор, Пелагея, Феликс–влакын лӱм кечышт.
Матвеев Владимир
Чыланыштым саламлем!
