10 декабрьыште кажне ийын Марий тиште кечым памлемдат. Тений тиде пайремым Мер-политик рӱдерыште (Йошкар-Ола, Гагарин урем, 8 № пӧртыштӧ) пайремлена. 10 ноябрьыште Марий Элын рӱдӧ олаштыже 13 шагатлан тиште кечылан пӧлкалалтше форум тӱҥалеш. Российын тӱрлӧ кундемыштыже илыше да мер толкынышто шкем чолган ончыктышо еҥ-влак толшаш улыт, нунын коклаште самырык-влакат. Марий-влак марий йодышым, интернетыште Марий йылмын вияҥмыжым каҥашаш тӱҥалыт. Тиде кечынак Йыван Кырла медальым налше южо еҥын оҥыштышт тиде пале йылгыжаш тӱҥалеш. Каласыман, Йыван Кырля медальым тений Йыван Кырлан 100 ийже лӱмеш луктыныт, тений тудым марий тӱняште паша дене шкем чолган ончыктышо 300 наре еҥлан кучыктат. Икмыняр еҥлан Йыван Кырла медальым кодшо тылзынак налыныт. Нунын коклаште М.Шкетен театрын артистше, Йыван Кырла рольым модшо Рауль Гарифулин, «Йыван Кырла» пьесым возышо Юрий Соловьев, Шернур кундем гыч Йыван Кырлан усталыкшым шымлыше Зинаида Ермакова, поэтесса Зоя Дудина. Но а Марий тиште кечышке чыла кумылан-влакым вучат, 10 декабрьыште Йошкар-Олаште 13 шагатлан тӱҥалеш.

Ноябрь мучаште Марий кугыжаныш университетыште «Мо? Кушто? Кунам?» уш-акыл модыш дене VII чемпионат эртен. Тушто вузысо 17 факультет ден институтын командышт ¢чашен. А тиде модышлан негызым эше 2003-шо ийыштак пыштыме. Чемпионат кажне ийын у сыным налеш, тудын условийже вашталтеш, студент ден аспирант-влак коклаште кумдан шарлен толеш да шуко фанатым шочыкта. «Мо? Кушто? Кунам?» модышышто I вер – юридический факультетын «Артхашафтра», II вер биолого-химический факультетын «Виоленты», III вер филологий да журналистика факультетын «Афина» командыштлан логалын. Нунылан кажныжлан 1500, 1000 да 750 теҥге окса премийым, тыгак книга пºлекым кучыктымо. Тидлан надырым вузын ректоратше пыштен, палдара Марий кугыжаныш университетын пресс-службыжо.

Марина Глушкова